Նուրբ, վառ և շատ համեղ աղցան, որը հիանալի կլինի Ձեր տոնական սեղանի համար։ Աղցանը կպատրաստենք հայտնի «Միմոզայի» բաղադրատոմսով, չնչին փոփոխություններով։ Ամեն ինչ այնքան էլ բարդ չէ, որքան կարող է թվալ առաջին հայացքից: Շերտավոր աղցանները, կարծում եմ, բոլորն են պատրաստել, բայց այստեղ պարզապես պետք է զգուշորեն դրանց տալ ռուլետի տեսք։
Պատրաստման համար անհրաժեշտ են հետևյալ բաղադրիչները․
- Սապատաձկան պահածո — 250 գրամ
- Կարտոֆիլ — 3 հատ
- Գազար — 1 հատ
- Ձու — 3 հատ
- Կանաչ սոխ — փունջ
- մայոնեզ — ըստ ճաշակի
- Աղ — ըստ ճաշակի
- Հազար — ըստ ճաշակի
Պատրաստման եղանակը․
Պատրաստել բոլոր անհրաժեշտ բաղադրիչները։ Կարտոֆիլը, գազարն ու ձուն նախապես աղաջրի մեջ եփել ու մաքրել։ Տախտակը ծածկեք սննդի փաթեթավորման տոպրակով և դրա վրա դասավորեք աղցանը՝ նախ շերտերով։
1-ին շերտ՝ խոշոր քերիչով անցկացված կարտոֆիլն է ու մայոնեզը։
2-րդ շերտ՝ քերած ձու։
3-րդ շերտ՝ քերած գազար և մայոնեզ։
Հեռացրեք ձկան ոսկորները և մաշկը, ապա մանրացրեք պատառաքաղով։ Սա պետք է լինի 4-րդ շերտը՝ վրան մի քիչ մայոնեզով։ Վերջում շաղ տվեք մի քիչ կանաչ սոխ:
Այժմ աղցանը սննդի փաթեթավորման տոպրակի օգնությամբ փաթաթեք ռուլետի պես և մի քանի ժամով դրեք սառնարանում։ Այնուհետև սուր դանակով բաժանեք մասերի և մատուցեք՝ ձևավորելով հազարի տերևներով։ Բարի ախորժակ։
Նյութը հրապարակման պատրաստեց ՆՈՐ ԻՆՖՈ-ն
